စိတ်ဓာတ်က တန်ဖိုးမရှိတာလား၊ ဘွဲ့ဝတ်စုံက တန်ဖိုးမရှိတာလား

Written by အငြိမ်းစား ကျောင်းဆရာတစ်ဦး

မကြာသေးခင်က ဂျာနယ်တစ်စောင်ရဲ့ ကာတွန်းမှာ ဘွဲ့ဝတ်စုံ ဝတ်ထားတဲ့ ဓာတ်ပုံကို ကလေးတစ်ယောက် က ကြည့်ပြီးတော့ သူ့ဖခင်ကို “ဒါဆန္ဒပြ ဝတ်စုံလား ဟင်” လို့ မေးလိုက်တာကို တွေ့ပြီး အတော်လေး စိတ်မကောင်း ဖြစ်သွားမိပါတယ်။

လူငယ်တွေ ဘွဲ့ဝတ်စုံနဲ့ပတ်သက်ပြီး လုပ်ဆောင်နေ ချက်တွေကို သတိထား ဆင်ခြင်သင့်ပြီ ထင်ပါတယ်။ တက္ကသိုလ် ဆရာ၊ ဆရာမတွေလည်း ကိုယ့်တပည့်တွေ လုပ်ဆောင်နေမှုနဲ့ ပတ်သက်ပြီး သင့်မသင့် ပြောကြားကြ စေချင်ပါတယ်။ ခုတစ်လော ကျောင်းသားတွေ ဆန္ဒပြနေကြတာ ဘွဲ့ဝတ်စုံဝတ်ပြီး ပဲပြုတ်တောင်ခေါင်းရွက်၊ ရေစည်လှည်းတွန်း၊ ဆိုက္ကားနင်းပြတဲ့ Performance တွေ လုပ်နေတာတွေကို တွေ့ရပြီး စိတ်မချမ်းသာလွန်းတဲ့ အတွက် ဒီစာကိုရေးမိပါတယ်။

ဘွဲ့ဝတ်စုံဝတ်ပြီး အခမ်းအနားတက်တယ်ဆိုတာ ဘွဲ့ကို သို့မဟုတ် လက်မှတ်ကို လေးစားဂုဏ်ပြုပြီး အားလုံး ယူနီဖောင်းဖြစ်အောင် ဝတ်ဆင်ကြရတာဖြစ်ပါတယ်။ ဘွဲ့ဝတ်စုံအောက်မှာ သိန်းချီ၊ သန်းချီပြီးဝတ်စားထားလည်း သတ်မှတ်ထားတဲ့ ဘွဲ့ဝတ်စုံအောက်မှာ တစ်သွေးတည်း တစ်သားတည်း ဖြစ်ကြောင်း ပြဆိုဖို့ ဆင်တူ ဝတ်ဆင် ထားကြတာလည်း ဖြစ်ပါတယ်။

ကျွန်တော်တို့ တက္ကသိုလ်တက်တုန်းက နောက်ဆုံးနှစ် ဘွဲ့ယူခါနီးတော့ အဆောင်မှူးကို ကျောင်းသားတွေထဲက တစ်ဦးက “ဆရာကြီး ကျွန်တော်တို့ ဆိုက္ကားစီးပြီး ဘွဲ့လာယူလို့မရဘူးလား” လို့ထမေးလိုက်ပါတယ်။ မြန်မာစာ ပါမောက္ခဖြစ်တဲ့ ဆရာကြီးက ပြုံးရွှင်စွာပဲ

“ရတာပေါ့တပည့်တို့ရာ၊ ဒါပေမဲ့ တစ်ခုစဉ်စားဖို့သင့်တာပေါ့။ ဘွဲ့ဝတ်စုံဆိုတာ လူတိုင်း ဝတ်နိုင်တာမှ မဟုတ်တာ။ နေရာတိုင်းဝတ်ရတာမှ မဟုတ်တာ။ တပည့်တို့ကို ဘွဲ့ပေးတယ်ဆိုတာကလည်း တတ်တာ၊ မတတ်တာထက်၊ တပည့်တို့ကို အဆင့်အတန်းတစ်ခုအနေနဲ့ သတ်မှတ်ပေးလိုက်တာ။ တပည့်တို့ လေးနှစ်တာကာလ ဤ တက္ကသိုလ်ကြီးတွင် သင်ယူခဲ့ကြကြောင်း ဂုဏ်ပြုတဲ့ အနေနဲ့ပေးတာ။ ပေးတဲ့တက္ကသိုလ်ကဘွဲ့ကို လမ်းဘေးကလူ လာမယူနိုင်ဘူး။ တက္ကသိုလ်ဘွဲ့ကို လမ်းဘေးကအဝတ်အစားနဲ့ တက်ယူလို့မရဘူး။ အဲဒါ ဂုဏ်တစ်ခု၊ အဆင့် တစ်ရပ်အနေနဲ့ သတ်မှတ်ထားတာ။ အဲဒါကို တပည့်တို့က ဘွဲ့ဝတ်စုံပြီးဝတ်လာပြီး ဆိုက္ကားနဲ့လာမယ်ဆိုရင်လည်း ဘွဲ့ဝတ်စုံနဲ့ ဂုဏ်အပေါ် တပည့်တို့က ဘယ်လိုသတ်မှတ်သလဲဆိုတဲ့ စိတ်နဲ့ အဆင့်အတန်းကို ပြန်ပြတာပဲ။ တန်ဖိုး ဆိုတာ တစ်ခါတစ်လေ “သိ” မှ “ရှိ” တာပါ” ဆိုတဲ့စကားကို တစ်သက်လုံး မှတ်သားခဲ့ရတဲ့ ကျွန်တော်တို့အဖို့က တော့ ကိုယ့်ခေတ်ကိုယ့်အခါက လမ်းညွှန်သင်ပြနိုင်ခဲ့တဲ့ ဆရာတွေနဲ့ ကြုံတွေ့ခဲ့ရတာကိုပဲ ကျေးဇူးကြီးလှပြီလို့ ယူဆနေမိပါတယ်။

ဘွဲ့က တန်ဖိုးမရှိဘူး။ အလကားဘွဲ့။ သုံးစားမရတဲ့ဘွဲ့လို့ အထပ်ထပ်အော်နေတာလည်း ကြားနေရပါတယ်။ ကျွန်တော် အထက်မှာ ပြောခဲ့သလို တန်ဖိုးဆိုတာ “သိ” မှ “ရှိ” တာဆိုတဲ့ စကားကိုပဲ ပြန်ညွှန်းပါရစေ။

ဘွဲ့ရခဲ့တဲ့ ပုဂ္ဂိုလ်တွေကို ကျွန်တော်တစ်ခုသတိပေးချင်ပါတယ်။ ခင်ဗျားတို့ ဘယ်နည်းနဲ့ပဲ ဘွဲ့ရလာသည်ဖြစ်စေ သတ်မှတ်ထားတဲ့ အရည်အချင်းစစ်စာမေးပွဲကို မအောင်မြင်ဘဲနဲ့ အဲဒီဘွဲ့ကို မရပါဘူး။ သတ်မှတ်ထားတဲ့ အခကြေးငွေများ အကြေပေးဆောင်ရတယ်။ ကျောင်းခေါ်ကြိမ်မှန်အောင် တက်ခဲ့ကြရတယ်။ ဒါမှလည်း စာမေးပွဲ ဖြေဆိုခွင့်ကို ဦးစွာရတယ်။ စာမေးပွဲဖြေခွင့်ရ၊ စာမေးပွဲအောင်မှ ဘွဲ့ရလာတဲ့သူတွေချည်းပါပဲ။ ဘယ်သူမှ ဘွဲ့တစ်ခုကို အလကားမရပါဘူး။ ဘွဲ့ရပြီး အလုပ်ရတာ၊ မရတာ၊ လုပ်တာ၊ မလုပ်တာက တစ်ပိုင်းလို့ ထင်ပါ တယ်။ အဲဒါကလည်း ဘွဲ့ဝတ်စုံနဲ့ မဆိုင်ပါဘူး။

ဘွဲ့ယူရင်သတ်မှတ်ချက်မှာ ဘွဲ့ယူအခမ်းအနားသို့ တက်ရောက်သူများသည် ပညာရှင်များပီပီ မိမိတို့ ပညာရပ် ဆိုင်ရာ ဘွဲ့ဝတ်စုံများကို၊ ဂုဏ်အဆင့်အတန်းနှင့် ကိုက်ညီစွာ ဝတ်ဆင်ရမည်ဆိုတာ နိုင်ငံတကာစံပါ။ ကိုယ့်တစ်နိုင်ငံတည်းက တီထွင်ထားတာ မဟုတ်ပါဘူး။ ဘွဲ့ယူတဲ့စနစ်ကလည်း မြန်မာ့နည်းမြန်မာ့ဟန် မဟုတ်ပါဘူး။ အနောက်တိုင်းစတိုင်၊ အလေ့အထတွေအတိုင်း ဘွဲ့ယူ၊ ဘွဲ့ပေးနေကြတာပါ။

လူတိုင်းသူ့နေရာနဲ့ သူ့အထာဆိုတာကို ဂရုစိုက်ကြရပါတယ်။ ဘာကြောင့်လဲဆိုတော့ လူ့ဘောင်အသိုင်းအဝိုင်း ထဲမှာ လူတစ်ယောက်အနေနဲ့ နေထိုင်ကြရတာဆိုတော့ လူလိုကျင့်၊ လူလိုကြံ၊ လူလိုနေကြဖို့ အရေးကြီးပါတယ်။ ဘွဲ့ဝတ်စုံကြီးဝတ်ပြီးတော့ အရက်မူးပြီး လမ်းဘေးမှာလဲနေရင် အဲဒီဘွဲ့ဝတ်စုံ ဝတ်ထားတဲ့လူ သိက္ခာကျတာထက် “ဘွဲ့” ဆိုတဲ့ ဂုဏ်ကို ညှိုးမှိန်အောင်လုပ်ပြီး လူတိုင်းအထင်သေးမလေးစားအောင် လုပ်ရာကျပါတယ်။

ဘွဲ့ဆိုတာကို အထင်မကြီးရင် အစကတည်းက တက်မယူကြနဲ့ပေါ့။ အဲဒီ ဘွဲ့ပေးတဲ့ တက္ကသိုလ်တွေကို ဝေးဝေး ရှောင်နေပေါ့။ ဘွဲ့ရမှ အလုပ်ခန့်မယ်ဆိုတာ သတ်မှတ်ချက်တစ်ခုပါ။ ဘယ်သူမှ တတ်တယ်၊ မတတ်ဘူးလို့လည်း ဒီခေတ်မှာ စစ်ဆေးနေတာ မဟုတ်တော့ပါဘူး။ အလုပ်ခေါ်ရင် ဘွဲ့ရဖြစ်ရမယ်ဆိုတာ စံတစ်ခုပဲ။ ဘွဲ့ရရင် လာခဲ့၊ ဘွဲ့မရရင် မလာခဲ့နဲ့လို့ သတ်မှတ်ထားသလိုဖြစ်နေတဲ့အတွက် ဘွဲ့ဆိုတာ တန်ဖိုးမရှိဘူးလို့လည်း မပြောနိုင်ပါဘူး။

လု့ဘောင်အသိုင်းအဝိုင်းက သူ့နေရာ၊သူ့အဆင့်အတန်းဆိုတာကို လက်ခံထားပါတယ်။ အသုဘအခမ်းအနားကို မင်္ဂလာဆောင်သွားသလို မလာကြဘူး။ မင်္ဂလာဆောင် အခမ်းအနားကိုလည်း စွတ်ကျယ်ဂျိုင်းပြတ်နဲ့ ပုဆိုး ခါးတောင်းကျိုက်ပြီး လာလေ့မရှိပါဘူး။ သူ့နေရာနဲ့သူ ဝတ်စားကြတယ်ဆိုတာ လူ့ဘောင်ရဲ့ ယဉ်ကျေးမှု တစ်ရပ်လို့ ဆိုနိုင်ပါတယ်။ လူ့ဘောင်ကသတ်မှတ်ထားတဲ့ စံလွှဲပြီး လုပ်ဆောင်ချက်တစ်ရပ်ဟာ တစ်ခါတစ်လေ စော်ကားမော်ကား လုပ်သလို ဖြစ်တတ်ပါတယ်။ ဘွဲ့ဝတ်စုံကို စော်ကားတာဟာ ကိုယ့်အဆင့်အတန်းနဲ့ ကိုယ့်ကိုယ်ကိုယ် ပြန်ပြီး စော်ကားနေသလိုမျိုး ဖြစ်သွားတတ်တယ်ဆိုတာလည်း သတိပြုစေချင်ပါတယ်။

ခေတ်သစ် Performance အနေနဲ့ ကြိုက်တဲ့ဝတ်စုံဝတ်ပြီး ဆန္ဒပြနိုင်ပါတယ်။ မကျေနပ်ရင် ဘာမှ မဝတ်ဘဲနဲ့ လည်း ဆန္ဒပြလို့ရပါတယ်။ ဘွဲ့နဲ့ ရှာဖွေလုပ်ကိုင်စားသောက်နေကြတဲ့ ကိုယ့်ရဲ့ မိဘ၊ ဆွေမျိုး၊ ညီအစ်ကို၊ မောင်နှစ်မတွေ ကို စော်ကားသလိုမျိုး ဘွဲ့ဝတ်စုံကြီးတွေဝတ်ပြီး Performance လုပ်နေတာတွေကတော့ အမြင် မတော်လို့ ရပ်တန်းကရပ်ကြပါလို့ မေတ္တာရပ်ခံချင်ပါတယ်။

The Voice Journal

--------------------------------------
ကိုမျိုး(lwanmapyay.blogspot.com) လွမ်းမပြေ သုတရပ်ဝန်း | Facebook

ဆက်စပ်ဖတ်ရှုရန် အကြောင်းအရာများ...