အချစ်ရေးတွင် မျှတမှုနှင့် နားလည်မှုရှိခြင်းက အရေးပါကြောင်း ရှာကီရာ မှတ်ချက်ပြု
အပေးအယူ မျှမျှတတ ဆွေးနွေးပြောဆိုခြင်းသည် အချစ်ရေးကို ခိုင်မာတည်မြဲအောင် ထိန်းသိမ်းနိုင်သည့် နည်းလမ်းကောင်းတစ်ခုဖြစ်ကြောင်း ရှာကီရာက ပြောကြားခဲ့သည်။ ကိုလံဘီယာ Popဂီတ ကြယ်ပွင့်သည် ဘာစီလိုနာ ဘောလုံးအသင်းမှ နောက်တန်း ကစားသမား ဂျရတ်ပီကေးနှင့် တွဲနေပြီး အသက်(၁၅)လ အရွယ် သားငယ် မီလန်ကိုပင် ဖွားမြင်ထားပြီး ဖြစ်သည်။ Can’t Remember to Forget Youစတား ရှာကီရာက သူမနှင့် ပီကေးတို့ကြား ဆက်ဆံရေး ကောင်းမွန်လှပစေသည့် အကြောင်းရင်းကို ဖွင့်ဟပြခဲ့ရာ ဆက်ဆံရေး၌ နှစ်ဦးစလုံး တူညီသည့် အခွင့်အာဏာ ရှိနေပြီး မျှတမှုသည် အခြေခံ အကျဆုံး လိုအပ် ချက်ဖြစ်ကြောင်း ပြောဆိုသွားသည်။
အသက်(၃၇)နှစ်ရှိ အဆိုတော်က “ပေါင်းသင်းဆက်ဆံရေးမှာ အပေးနဲ့အယူ ဆိုတာတော့ ရှိတာပဲ။ ဒါကို ထိန်းညှိနိုင်မှသာ ရေရှည်တည်မြဲနိုင်မယ်လေ”ဟု ဆိုသည်။ Ocean Drive မဂ္ဂဇင်းနှင့် အင်တာဗျူးတွင် ရှာကီရာက “ဂျရတ်က ကျွန်မကို ဘာလုပ်ရမယ်ဆိုတာ ဘယ်တော့မှ ပြောဆိုတာမျိုး မရှိဘူး။ ကျွန်မ တို့ နှစ်ယောက်ဟာ ကိစ္စတိုင်းကို စုံတွဲတစ်တွဲ အနေနဲ့ ဆွေးနွေးတယ်။ ဒါမျိုးက တကယ့်ကို တည်ငြိမ်တဲ့ စုံတွဲတော်တော်များများလည်း လုပ်လေ့ရှိမယ် ထင်ပါတယ်။ ကျွန်မတို့မှာ လှပတဲ့ ပေါင်းသင်းဆက်ဆံရေး တစ်ခုရှိတယ်။ ပြီးတော့ အပြန်အလှန် ယုံကြည်မှု တစ်ခုလည်း ထူထောင်ထားတယ်”ဟုလည်း ဆက်လက် ပြောဆိုသွားသည်။
သူမက မိခင်ဘဝသည် ဖြတ်သန်းခဲ့ရသမျှ ယခင်အတွေ့အကြုံများနှင့် လုံးဝဥဿုံ ခြားနားသွားကြောင်းလည်း မှတ်ချက်ပြုခဲ့သည်။ “အရာရာ ကွဲပြားသွားတာပါ။ အကြီးမားဆုံး အပြောင်းအလဲကတော့ အနာဂတ်အတွက် ကျွန်မအနေနဲ့ အရင်ကထက် ပိုပြီးတော့ တွေးတောမိလာတာပါပဲ။ ကျွန်မသားလေးအတွက် ကမ္ဘာကြီးဟာ ဘယ်လိုပုံစံ ဖြစ်လာမလဲ။ သူဘယ်လိုများ ကြီးပြင်းလာမလဲ ဆိုတာမျိုးတွေပေါ့”ဟု ရှာကီရာက ဖွင့်ဟသွား သည်။
Planet Myanmar Network