ဘုရင်တစ်ပါးရဲ့ အချစ်ပုံပြင် (The Love of a King) (အပိုင်း ၄)

(၄) တွေ့ဆုံခြင်း

၁၉၃ဝခုနှစ် ဆောင်းဦး ရာသီမှာ Edward က သူ့သူငယ်ချင်းဖြစ်တဲ့ သခင်Furness တို့ ဇနီးမောင်နှံဆီမှာ ခဏတာ နေထိုင်ခဲ့တယ်။ “A King’s Story”ဆိုတဲ့ စာအုပ် တစ်အုပ်မှာ Edward က ဒီလို သရုပ်ဖော် ရေးသားခဲ့ပါတယ်။

“အဲဒီစနေနေ့မှာ ရာသီဥတုက အေးလွန်းတယ်၊ လေကလည်း တိုက်တယ်။ မိုးသည်းသည်း ထန်ထန် ရွာသွန်းနေခဲ့လို့ ကျွန်တော်တို့
မြင်းစီး မထွက်နိုင်ခဲ့ကြဘူး။ အိမ်ထဲမှာပဲနေပြီး နေ့လယ်စာ စောစော စားဖို့ ကျွန်တော်တို့ ဆုံးဖြတ် လိုက်ကြတယ်။ လေဒီ Furness ရဲ့ မိတ်ဆွေ တချို့နဲ့အတူ ကျွန်တော်တို့ နေ့လယ်စာ သုံးဆောင်မှာ ဖြစ်တယ်။”

၁နာရီထိုးတော့ Wallisနဲ့ သူ့ခင်ပွန်း ရောက်လာခဲ့တယ်။ သူဝတ်စားထားတာ အရမ်းလှတယ်။ တစ်ချိန်လုံး သူပြုံး နေခဲ့ပါတယ်။ သူဟာ သခင် Furnessနဲ့ မိနစ်အနည်းငယ် စကားပြောပါတယ်။ အဲဒီနောက် လေဒီ Furness က သူ့ကို ကျွန်တော်ရှေ့ ခေါ်လာခဲ့ပါတယ်။

“အရှင်… အရှင့်ကို ကျွန်မရဲ့ ချစ်စရာအကောင်းဆုံး၊ အချိုသာအလှဆုံး အမေရိကန် သူငယ်ချင်းနဲ့ မိတ်ဆက်ပေး ချင်ပါတယ်။ Mrs Wallis Simpsonပါ”

“နေကောင်းပါလား.. Mrs Sompson” ကျွန်တော်ပြောလိုက်တယ်..

“ကျေးဇူးပြုပြီး ဒီဘက်မှာ ထိုင်ပါဦး”။

ကျွန်တော်တို့ကိုထားပြီး လေဒီ Furness ထွက်သွားတယ်။ ကျွန်တော်တို့ စကားစမြည်းစကြပါတယ်။

Wallis နေသိပ်မကောင်းမှန်း ကြည့်တာနဲ့ ကျွန်တော်သိလိုက်တယ်။ သူ တော်တော်လေးနှာစေး ချောင်းဆိုး နေတယ်၊ မျက်လုံးလည်း နီနေတယ်။

“ကျွန်တော်တို့ရဲ့ အင်္ဂလန်အိမ်က သိပ်မနွေးလို့ထင်ပါတယ်။ ကျွန်တော်တို့ဆီမှာ အမေရိကန်လို ပင်မအပူပေး စနစ်မရှိဘူး”

စကားဝိုင်းက အကြာကြီး တိတ်ဆိတ်သွားခဲ့တယ်။ Mrs Simpson က ခေါင်းလှည့်ပြီး ပြတင်းပေါက်အပြင်ဘက်ကို ကြည့်လိုက်တယ်။ အဲဒီနောက်
“အရှင်က ကျွန်မကို စိတ်ပျက်စေခဲ့ပြီ”လို့ သူပြောတယ်။

“ဘာဖြစ်လို့လဲ” ကျွန်တော် မေးတယ်။

“လူတိုင်းက ကျွန်မကို အမေရိကန်ပင်မအပူပေးစနစ် မေးခဲ့ကြတယ်။
ဝေလမင်းသားက ဒီ့ထက်စိတ်ဝင်စားစရာကောင်းတာကို ပြောလိမ့်မယ်လို့ ကျွန်မထင်ခဲ့တယ်”

ကျွန်တော် ရယ်မောလိုက်တယ်။

“ဘာဖြစ်တာလဲ အရှင်.. ကျွန်မ ဘာအမှားပြောလိုက်မိလို့လဲ” Wallis မေးတယ်။

“မဟုတ်ပါဘူး.. ကျွန်တော်ရယ်တာက ခင်ဗျား ကျွန်တော့်ကိုမလိမ်လို့။ ကျွန်တော့်ကို ခင်ဗျားစကား အမှန်ပြော တယ်” ကျွန်တော်ပြန်ဖြေတယ်။

“ဒါ ဘာရယ်စရာရှိလို့လဲ… လူတိုင်းက ဒီလိုပဲမဟုတ်လား”

“တစ်နေ့နေ့တစ်ချိန်ချိန်မှာ ကျွန်တော်က အင်္ဂလန်ရဲ့ဘုရင်မင်းမြတ်ဖြစ်လာမယ်။ ဒါကြောင့် လူတွေက ကျွန်တော့်ကို ကြောက်ကြတယ်။ တကယ်လို့ ကျွန်တော်က ကောင်းကင်ကအဝါရောင်လို့ပြောရင် “ဟုတ်ပါတယ် အရှင်.. အရှင်ပြောတာမှန်တယ်”လို့ သူတို့ပြောကြမယ်။ တကယ်လို့ ဗုဒ္ဓဟူးနေ့ဟာ ရက်သတ္တပတ်ရဲ့ပထမရက်လို့ ကျွန်တော်ပြောရင် “ဟုတ်ပါတယ် အရှင်.. အရှင်ပြောတာမှန်တယ်”လို့ သူတို့ပြောကြမယ်။ တကယ်လို့ စကော့တလန်က ကနေဒါထက်ကြီးတယ်လို့ ကျွန်တော်ပြောရင် “ဟုတ်ပါတယ် အရှင်.. အရှင်ပြောတာမှန် တယ်”လို့ သူတို့ပြောကြမယ်။ ဒါပေမယ့် ကျွန်တော်က လူကိုစိတ်ပျက်ငြီးငွေ့စေတယ်လို့ ခင်ဗျားပြောခဲ့တယ်။ စကားအမှန်ကို ခင်ဗျားပြောတယ်။ ကျွန်တော်က ဒါမျိုးမှကြိုက်တာ”

တိတ်ဆိတ်သွားပြန်တယ်။ အဲဒီနောက် Wallis ရယ်မောလာပါတယ်။

“ကျွန်မနောက်တစ်ခု ထပ်ပြောလို့ရမလား.. အရှင်”

“ဟုတ်ကဲ့… Mrs Simpson၊ ဘာများပါလိမ့်”

“အရှင်ရဲ့ ဘောင်းဘီပါ…”

“ကျွန်တော့်ဘောင်းဘီ…”

“ဟုတ်ပါတယ် အရှင်… အရှင်ရဲ့ဘောင်းဘီက အနက်ရောင်ဖြစ်ပြီး ဖိနပ်ကအညိုရောင်ဖြစ်နေတယ်။ ဒီအရောင်နှစ်မျိုးက လိုက်ဖက်မှုနည်းနည်းမှ မရှိပါဘူး”

ကျွန်တော်ထရပ်ပြီး မှန်ကိုကြည့်လိုက်တယ်။

“ဟုတ်တယ်… ခင်ဗျားပြောတာ မှန်တယ် Mrs Simpson။ ကျွန်တော့်ကိုကြည့်ရတာ ထူးဆန်းနေသလိုပဲ။ နောက်တစ်ခေါက် ကျွန်တော်တို့ထပ်ဆုံတဲ့အခါ ပိုအဆင်ပြေပြေ ကျွန်တော်ဝတ်ခဲ့မှာပါ”

နေ့လယ်စာ အဆင်သင့်ဖြစ်တဲ့အခါ ထမင်းစားခန်းထဲ ကျွန်တော်တို့ဝင်သွားကြတယ်။ ကျွန်တော်က စားပွဲ တစ်ဘက်ထိပ်မှာထိုင်ပြီး Wallis က စားပွဲရဲ့အခြားတစ်ဘက်ထိပ်မှာထိုင်တယ်။ သူ့ကို ကျွန်တော် သေချာ အကဲခတ်ကြည့်လိုက်တယ်။ သူ့လက်တွေက လှလိုက်တာလို့ ကျွန်တော်တွေးနေတယ်။ လေဒီ Furnessနဲ့ သူစကားပြောနေတယ်။ မိနစ်အနည်းငယ်အကြာမှာ ကျွန်တော့်ဘက်ကို သူလှည့်ပြီး ပြုံးပြတယ်။ ကျွန်တော် အရမ်းဝမ်းသာမိတယ်။

နေ့လယ်စာပြီးတဲ့နောက် Wallis က ကျွန်တော့်ကိုလာနှုတ်ဆက်တယ်။
“ကျွန်မခင်ပွန်းနဲ့ကျွန်မ အခုပဲပြန်တော့မယ်.. အရှင်၊ ကျွန်မတို့ လန်ဒန်က နောက်ပါတီတစ်ခုကို သွားကြမှာပါ”

သူ့ကို ကျွန်တော်တစ်ခုခု ပြောချင်တယ်.. ဒါပေမယ့် သင့်တော်တဲ့စကား ရှာမရခဲ့ဘူး။ ဘာဖြစ်လို့ ဒီလိုဖြစ်မှန်း ကျွန်တော်နားမလည်ဘူး။ ကျွန်တော်တို့ လက်ဆွဲလက်နှုတ်ပြီးနောက် Wallis ထွက်ခွာသွားခဲ့တယ်။

ဘေးကအခန်းထဲ ကျွန်တော်ဝင်လိုက်ပြီး လေဒီ Furness အနားမှာ ဝင်ထိုင်လိုက်တယ်။

“Mrs Simpson ရဲ့အကြောင်း ကျွန်တော့်ကို ပြောပြပါ” လို့ ကျွန်တော်ပြောလိုက်တယ်။

“အရှင် ဘာတွေသိချင်တာလဲ” လို့ သူကမေးတယ်။

“အကုန်လုံး” လို့ ကျွန်တော်ပြောတယ်။

“ဒီလိုဆိုရင် .. အရှင်.. ပန်းခြံထဲ လမ်းဆင်းလျှောက်နိုင်မလား။ ပန်းခြံထဲမှာဆိုရင် ကျွန်မတို့ ပြောဆိုရ ပိုလွတ်လပ် တယ်”

ကျွန်တော်တို့ထရပ်ပြီး နောက်ဖေးတံခါးကနေ ထွက်လာခဲ့တယ်။ သစ်ပင်တွေကြားမှာ ကျွန်တော်တို့ ဖြည်းဖြည်းချင်း လမ်းလျှောက်နေရင်း လေဒီFurness က ကျွန်တော့်ကို Wallis အကြောင်းပြောပြခဲ့တယ်….

××××××
အင်္ဂလိပ်မူရင်းဖတ်လိုသူအတွက် http://vk.com/doc28773765_231432051?hash=314b57fea542ed164a&dl=6e9058f7014fe9e62a (ဘာသာပြန်မှားယွင်းတာ၊ အသုံးအနှုန်း မှားယွင်း သုံးစွဲမိတာရှိခဲ့ရင် ကျေးဇူးပြုပြီးပြောပြပေးပါလို့.. ကျွန်မက ကျွန်မပိုကျွမ်းကျင်တဲ့ တရုတ်ဘာသာကနေ မြန်မာ ဘာသာအဖြစ် ဘာသာပြန်ဆိုပါတယ်)

နိုင်းနိုင်းစနေ (Sept. 15. 2014)

--------------------------------------
ကိုမျိုး(lwanmapyay.blogspot.com) လွမ်းမပြေ သုတရပ်ဝန်း | Facebook

ဆက်စပ်ဖတ်ရှုရန် အကြောင်းအရာများ...