ပညာရေး အဟောသိကံဘဝ မရောက်အောင်
ဟယ်လို ၀၁-၈၆၁၀၅၈ စံတော်ချိန်ရေ- ၂၀၁၃ -၂၀၁၄ ပညာသင်နှစ် တက္ကသိုလ်ဝင်တန်း စာမေးပွဲ အောင်စာရင်းတွေ ဆိုင်ရာက ထုတ်ပြန် လိုက်တော့ ခြောက်ဘာသာ ဂုဏ်ထူးရှင်တွေ၊ ငါးဘာသာဂုဏ် ထူးရှင်တွေ ပေါ်ထွက်လာတာ ဝမ်းသာ ကြည်နူးစရာ ပါပဲဗျို့။ မိဘရှင်တွေရော၊ ကျောင်းသား၊ ကျောင်းသူတွေပါ မိမိတို့ အောင်မြင် မှုအတွက် အလွန်ပင် ကျေနပ်နှစ်သိမ့် နေကြမှာ အမှန်ပဲဗျာ။ ဒါပေမဲ့ စံတော်ချိန်ရေ- မတည်မငြိမ်ဖြစ်နေတဲ့ မြန်မာ့ပညာရေး စနစ်ကြီးနဲ့ ယခုတက္ကသိုလ် ဝင်တန်း အောင်မြင်လာသူ ဂုဏ်ထူးရှင်ကျောင်းသား၊ ကျောင်းသူတွေနဲ့တော့ တစ်ထောင့်တစ်ကွေ့မှာ ထိပ် တိုက်တိုးစရာ အခြေအနေကို ရောက်နေပြီလို့ အောင်မှိုင်းပြောချင်တယ်။
ကြည့်ပါဦး . . . . စံတော်ချိန်ရေ-တစ်နေ့က ဂျာနယ်တစ်စောင်က အင်တာဗျူးတစ်ခုမှာ ကျန်းမာရေး ဝန်ကြီးဌာနက လက်ရှိ ဆရာဝန်ဘွဲ့ရပြီး အလုပ်မပေးနိုင်၊ ခန့်စာမပေးနိုင်တဲ့ ကိစ္စပြောသွားတယ်။ မြန်မာနိုင်ငံတစ်ဝန်းမှာ ဆေးရုံတွေကလိုအပ်တဲ့ ဆရာဝန်တွေခန့်ထားဖို့ ဆရာဝန်ဦးရေ တစ်သောင်း ကျော်ခွင့်ပြုထားပါသတဲ့။ ဒါပေမဲ့ အမှန်တကယ် ခန့်စာထုတ်ပေးနိုင်တဲ့ ဆရာဝန်အရေအတွက်က ခြောက်ထောင်ကျော်ဆိုလားရှိပါသတဲ့။ ဒီလိုဆိုရင်ဗျာ။ ယနေ့ရန်ကုန်ဆေးတက္ကသိုလ် (၁) နှင့် (၂) မန္တလေးဆေးတက္ကသိုလ်၊ မကွေးဆေးတက္ကသိုလ်များက နှစ်စဉ် နှစ်စဉ်၊ ဆရာဝန်ဘွဲ့ရပြီး ထွက်လာ မယ့် ဆရာဝန်မောင်မယ်တို့ရဲ့ အနာဂတ်ကို ဘယ်လိုစဉ်းစားပေးနိုင်ကြမှာပါလဲ။ ဆရာဝန်မောင်၊ မယ် တွေစက်နဲ့လှည့်ထုတ်သလို နှစ်စဉ်ထွက်လာပြီး သူတို့ကိုအလုပ်တာဝန် ချထားပေးနိုင်ခြင်းမရှိခဲ့လျှင် ပညာရေးအဟောသိကံဖြစ်မှုကြီးနဲ့ ထိပ်တိုက်တိုးကြရပေတော့မယ်။ အဲဒီအခါမှာ ကျောင်းနေစငါးနှစ် အရွယ်၊ ခြောက်နှစ်အရွယ် သားငယ်၊ သမီးငယ်တွေကို မိဘတွေက ‘သားသားကြီးလာရင် ဘာလုပ် မယ်၊ မီးမီးကြီးလာရင် ဘာလုပ်မယ်မေးခွန်းထုတ်တဲ့အခါ ဆရာဝန်လို့ဖြေကြဦးမှာလား။ ယခုအတိုင်း သာရှေ့ခရီးဆက်သွားရင် ဆေးတက္ကသိုလ်များက နှစ်စဉ်မွေးထုတ်သွားမယ့် ဆရာဝန်မောင်၊ မယ်တို့ ရဲ့အနာဂတ်အတွက် ရတက်မအေးစရာ၊ ပူပန်စရာအခြေအနေတွေပါလား စံတော်ချိန်ရေ-
သည်အတိုင်းသာ သွားမယ်ဆိုရင် မြန်မာ့ပညာရေးစနစ်ကြီးကလည်း ယခုအထိဘာကြီးလဲမသိ။ ဆေး တက္ကသိုလ်များက နှစ်စဉ်ထွက်လာမယ့်ဆရာဝန်မောင်၊ မယ်တို့ခမျာရဲ့ ဘဝကလည်းဘာကြီးလဲ မသိ။ အစိုးရဆေးဝန်ထမ်း သုံးနှစ်တာဝန်ထမ်းဆောင်ပြီးမှ ဘွဲ့လွန်ဆေးပညာ၊ မဟာတန်း (M.Sc) အတန်း တက်ခွင့်ရမှာဖြစ်တာမို့ ဆေးပညာတိုးတက်ဖွံ့ဖြိုးရေးအတွက် Father Study ခေါ်တဲ့ ဘွဲ့လွန်ဆေး ပညာသင်ယူလိုကြတဲ့ ဆရာဝန်မောင်၊ မယ်တွေရဲ့ ကံကြမ္မာကလည်း ဘာကြီးလဲမသိ။
အားနာပါးနာနဲ့ပြောရရင် ဒီကနေ့လမ်းတကာလျှောက်ပြီး ပစ္စည်းအဟောင်းတွေ ဝယ်တယ်ဆိုတဲ့အသံ မျိုး တစ်နေ့သောအခါကာလမှာ ‘ဆရာဝန်၊ ဆရာဝန်ရောဂါစုံကုတယ်’ လို့ဆေးအိတ်ကိုင်ပြီး ဆရာဝန် တွေလမ်းတကာလျှောက်ဆေးကုမယ့်ခေတ် မရောက်ဘူးလို့ ဘယ်သူပြောနိုင်မှာလဲဗျို့။
ပြောချင်သေးတယ် စံတော်ချိန်ရေ-
ဆရာဝန်မောင်၊ မယ်တွေကို အလုပ်ခန့်၊ ရာထူးဝန်စာမေးပွဲဖြေခိုင်း၊ လူတွေ့မေးလုပ်ကြတော့ လက်ရှိ ဗဟုသုတအခြေအနေကအစ တောင်တရုတ်ပင်လယ်မှာ နိုင်ငံရေးအခြေအနေဘယ်လိုလဲ၊ ဘာလဲ မေးခွန်းထုတ်သတဲ့ဗျို့။ ရယ်စရာကြီးဗျာနော်။
တကယ်က လုပ်ငန်းခွင်ဝင်မယ့် ဆရာဝန်မောင်၊ မယ်တွေကို ပညာရည်စစ်ဆေးချင်ရင် ကျန်းမာရေးဝန် ကြီးဌာနက တကယ့်ထိတ်ထိတ်ကြဲပညာရှင် ဆေးပညာပါရဂူတွေက သူ့အရပ်၊ သူ့ဇာတ်ဆိုသလို မေးခွန်းထုတ်၊ ပညာရည်စစ်သင့်ပါသော်ကောဗျာ။ တောင်တရုတ်ပင်လယ်မှာ ဘာဖြစ်နေတာမသိလို့ ဆေးဆရာဝန်ခန့်ထားရေး နှောင့်နှေးခြင်းမဖြစ်စေသင့်ဘူးဗျာ။ စဉ်းစားကြပါ။ စဉ်းစားကြပါ။
ပြောရဦးမယ်။ စစ်ဆေးတက္ကသိုလ်က ဆင်းလာတဲ့ဆရာဝန်၊ စစ်ဗိုလ်တွေကျတော့ ကျောင်းဆင်းတာနဲ့ တစ်ခါတည်း ခန့်စာပေး၊ တာဝန်ကျရာဌာနပုိ့သတဲ့။ အဲသည်လိုပဲ ယခုဆေးတက္ကသိုလ်အသီးသီးက သတ်မှတ်တဲ့ပညာရည်အောင်မြင်လို့ ဆရာဝန်ဖြစ်လာသူတွေ၊ လုပ်ငန်းခွင်ဝင်နိုင်အောင် မလုပ်ပေး သင့်ပေဘူးလား။ မလုပ်ပေးနိုင်ရင် ဘာကြောင့်လဲ။
၁၉၆၂ ခုနှစ်စစ်ဗိုလ်တွေ၊ အာဏာရှင်ဖြစ်လာကတည်းက ကမောက်ကမဖြစ်ခဲ့ရတဲ့ မြန်မာ့ပညာရေး လောကကြီးဟာ ယနေ့အထိ မတည်ငြိမ်သေး။ သည်အချိန်မှာခြောက်နှစ် ပညာသင်ပြီးမှ ဆေး တက္ကသိုလ်ကဆင်း၊ အလုပ်လက်မဲ့ဖြစ်ရမယ့် ဘဝကိုယခုနှစ်ခြောက်ဘာသာ၊ ငါးဘာသာဂုဏ်ထူးရှင် တို့ရှေ့တိုးကြဦးမှာလား။ စဉ်းစားသင့်ကြပါပြီ။ ။
စံတော်ချိန်သတင်းစာ
ဇွန် (၁၉) ရက်၊ ၂၀၁၄ ခုနှစ်
--------------------------------------
ကိုမျိုး(lwanmapyay.blogspot.com) လွမ်းမပြေ သုတရပ်ဝန်း | Facebook