ထိုင်းတွင် မြန်မာလုပ်သား သုံးဦး အသတ်ခံရ

ထိုင်းနိုင်ငံတွင် မြန်မာလုပ်သားနှစ်ဦး အသတ်ခံခဲ့ ရသည့်အပြင် မြန်မာအမျိုးသမီး အလုပ်သမား တစ်ဦးပါ အဓမ္မပြုကျင့် အသတ်ခံခဲ့ ရသောကြောင့် အဆိုပါ ဖြစ်စဉ်များကို မြန်မာအစိုးရက ပါဝင်ဖြေ ရှင်းနိုင်ရေး သံရုံးသို့ အချက်အလက်များ ပေးပို့သွား မည်ဖြစ်ကြောင်း ပညာရေး နှင့် ဖွံ့ဖြိုးတိုးတက် ရေးဖောင်ဒေးရှင်း(FED)မှ သတင်းရရှိသည်။

‘‘မြန်မာသံရုံးက ထိထိ ရောက်ရောက် မဆောင် ရွက်ရင် ဒီအတိုင်းပဲ ဖြစ်နေမှာပါ။ ကျွန်တော်တို့အနေနဲ့ သံရုံးက ထိထိရောက်ရောက် ဆောင်ရွက်အောင် ဖြစ်စဉ်တစ်ခုလုံးနဲ့ သေဆုံးတဲ့သူတွေရဲ့ ကိုယ်ရေး ရာဇ၀င် အချက်အလက်တွေကို ဒီနေ့စုပြီး မနက်ဖြန်မှာ ပို့သွားမှာပါ’’ဟု FED အမှုဆောင်ဒါရိုက်တာ ဦးထူးချစ်ကပြောသည်။

အသတ်ခံခဲ့ရသူ မြန်မာအလုပ်သမားနှစ်ဦးမှာ တနင်္သာရီတိုင်းဒေသကြီး၊ သရက် ချောင်းမြို့နယ်၊ စောဖျားကျေး ရွာမှ ထိုင်းနိုင်ငံ၊ ဖန်ငခရိုင်ရှိ ဆောက်လုပ်ရေး လုပ်ငန်းခွင်တစ်ခုသို့ သွားရောက် လုပ်ကိုင်နေသူ ညီအစ်ကို နှစ်ဦးဖြစ်သည်။ သြဂုတ်လ ၁၃ ရက်က လုပ်ငန်းခွင်ထဲမှ အပြင်သို့ ထွက်၍ ဈေးဝယ်စဉ် ပြန်ရောက်မလာဘဲ သြဂုတ် ၁၅ ရက်တွင်မှ ဓားဒဏ် ရာများဖြင့် သေဆုံးနေသော ၎င်း တို့၏ ရုပ်အလောင်းကို ထိုင်းနိုင်ငံ အရေးပေါ်အလောင်းကောက်အဖွဲ့က ကောက်ယူရရှိခဲ့ခြင်းဖြစ် ကြောင်း သတင်းရရှိသည်။ ထို့ အပြင် အဓမ္မပြုကျင့်ခံရပြီး အသတ်ခံခဲ့ရသည့် အမျိုးသမီးမှာလည်း ရနောင်းခရိုင်၊ ကရဘူရိ မြို့နယ်ရှိ စိုက်ပျိုးရေးခြံတစ်ခုထဲတွင် သြဂုတ် ၁၅ ရက်က အသတ် ခံခဲ့ရခြင်းဖြစ်သည်။

‘‘မြန်မာအစိုးရတာဝန်ရှိသူ တွေအနေနဲ့ ထိုင်းအစိုးရတာဝန်ရှိသူတွေကို တရားဝင်ဆက်သွယ်သင့်ပါတယ်။ အဲဒီလိုမလုပ်ရင် ထိုင်းအာဏာပိုင်အနေနဲ့ ထိထိ ရောက်ရောက်အရေးယူဆောင် ရွက်မှာမဟုတ်ပါဘူး။ ထိုင်းနိုင်ငံ မှာ အလားတူ၊ လူသတ်မှု၊ လုယက်မှု၊ မုဒိမ်းမှု၊ ရိုက်နှက်မှုနဲ့ အလုပ်သမားအခွင့်အရေးချိုး ဖောက်မှုတွေ၊ မကြာခဏဖြစ်တယ်။ မြန်မာအစိုးရအနေနဲ့ ထိုင်းနိုင်ငံရောက် မြန်မာရွှေ့ပြောင်း အလုပ် သမားတွေကို အကာ အကွယ်ပေးမှုတွေ အရေးပေါ် လုပ်ဆောင်သင့်ပါတယ်’’ဟု ဦးထူးချစ်ကပြောသည်။

သေဆုံးသူ ညီအစ်ကိုနှစ် ဦး၏ ရုပ်အလောင်းကို ထိုင်းမွန်ယ်ဆေးရုံသို့ ပို့ဆောင်ထားပြီး မိသားစုများက ထိုင်းမွန်ယ်မြို့ နယ်ရဲစခန်းတွင် အမှုဖွင့်ထား ကြောင်း သတင်းရရှိသည်။

ညီအစ်ကို နှစ်ဦးကို သတ်ဖြတ်သူများမှာ ထိုင်း လမ်း သရဲများဖြစ်ကြောင်း သုံးသပ်မှုများရှိနေပြီး ထိုင်းနိုင်ငံ ရောက် မြန်မာအလုပ်သမားဖြစ်သူ ကိုစောမောင်က ‘‘အခုလို ဖြစ်စဉ်တွေဆိုတာ ထိုင်းနိုင်ငံ အနှံ့မှာ ရောက်ရှိနေထိုင်တဲ့ မြန်မာအလုပ်သမားတွေ နေ့စဉ်ကြုံတွေ့နေရ တဲ့ အဖြစ်အပျက်တွေပါ။ မုဒိမ်း မှု၊လူသတ်မှုစတဲ့ ရာဇ၀တ်မှုတွေ ကို (မြန်မာသံရုံး) အစိုးရရဲ့ လုပ် ကိုင်ခွင့်ပါဝါအပြည့်နဲ့ လုပ်ရပါမယ်။ ကျွန်တော်တို့လို အဖွဲ့ အစည်းတွေ မလုပ်နိုင်တဲ့ အလုပ် ဖြစ်ပြီး မြန်မာသံရုံးကလည်း ဒီလိုကိစ္စမျိုးကို လုပ်ပေးရကောင်းမှန်းမသိတာကြောင့်ရော်ဘာခြံထဲမှာ အဓမ္မပြုကျင့်ပြီး သတ်ဖြတ် တယ်။ ရွှေ၊ ငွေတွေ ယူသွားတာ တွေ ထိုင်းနိုင်ငံတောင်ပိုင်း ရော်ဘာခြံထဲမှာ မရိုးနိုင်တဲ့ ဇာတ်လမ်း တွေပါ။ ဒီလိုအမှု မပေါ် ပေါက်တာ ကြောင့် ထိုင်းလမ်းသရဲတွေဟာ ဆက်လက် အတင့်ရဲနေတာပါ။ မြန်မာအစိုးရ အသိစိတ်ထဲ မှာ အချုပ်အခြာအာဏာဆိုတဲ့ ခေါင်းစဉ်အောက်မှာ တို့နိုင်ငံသားတစ် ယောက်ယောက်ကို လာထိရင် လည်း ငါတို့ကာကွယ်ရမယ်ဆိုတဲ့ အသိစိတ်မရှိသရွေ့တော့ အစ်ကိုတို့ ကျွန်တော်တို့ စိတ်မကောင်း ဖြစ်ရုံကတစ်ပါး တတ်နိုင်ကြမှာ မဟုတ်ဘူး’’ဟု ဆိုသည်။

ထိုင်းနိုင်ငံရောက် မြန်မာ အလုပ်သမားများကဲ့သို့ပင် မလေးရှားနိုင်ငံတွင်လည်း မြန်မာနိုင်ငံ သားများ အသတ်ခံရမှုမကြာခဏ ဖြစ်ပွားခဲ့သောကြောင့် မြန်မာ လုပ်သားများအား အကြမ်းဖက် တိုက်ခိုက်မှုများမှ ကာကွယ်ပေးရန်နှင့် ကျူးလွန်သည့် တရားခံ များကို အမြန်ဆုံးဖော်ထုတ်ပေးရန် မလေးရှားနိုင်ငံဆိုင်ရာ မြန်မာသံရုံးက ပြီးခဲ့သည့် ဇူလိုင်အတွင်းတွင် မလေးရှားအစိုးရထံ တောင်းဆိုခဲ့ဖူးသည်။

7Day Daily

--------------------------------------
ကိုမျိုး(lwanmapyay.blogspot.com) လွမ်းမပြေ သုတရပ်ဝန်း | Facebook

ဆက်စပ်ဖတ်ရှုရန် အကြောင်းအရာများ...