အာဆီယံတန်းဝင် မြန်မာ့ပထမဆုံး ကာယဗလမယ် ရွှေတံဆိပ်ဆုရှင်နှင့် တွေ့ဆုံခြင်း
၂၀၁၃ ခုနှစ် အရှေ့တောင်အာရှ အားကစားပြိုင်ပွဲ ပြုလုပ်ခဲ့ပြီး နောက်ပိုင်း လက်ဝှေ့၊ ဘောလုံး တိုက်ကွမ် ဒို စတဲ့ အားကစားနည်းတွေ ကနေ အမျိုးသားများနဲ့ တန်းတူ ရင်ဘောင်တန်း ပြိုင်ဆိုင်ခဲ့ကြပြီး ထူးချွန်တဲ့ မြန်မာ အမျိုးသမီး အားကစားသမားများစွာ ပေါ်ထွက်လာတာ တွေ့ရပါတယ်။ ထိုနည်းတူပဲ နိုင်ငံတကာ မှာ လူအများအားပေး စိတ်ဝင်စားကြတဲ့ ကာယဗလမယ် ပြိုင်ပွဲတွေ ရှိခဲ့ပေးမယ့် ယဉ်ကျေးမှုအရ၊ ရိုးရာ အရ ဆိုတာတွေကို စဉ်းစားခဲ့ ကြတာကြောင့် ခန္ဓာကိုယ် အလှကို ပြသရတဲ့ မြန်မာ့ ကာယဗလမယ်တွေ နည်းခဲ့ပါတယ်။ ဒီနှစ်မှာတော့ အရှေ့တောင် အာရှ နိုင်ငံ ၈ နိုင်ငံ ပါဝင်တဲ့ စင်ကာပူနိုင်ငံရဲ့ NUS center မှာ ပြုလုပ်ခဲ့တဲ့ ၁၆၅ စင်တီမီတာအောက် အမျိုးသမီး ကိုယ်ကာယအလှ ပြိုင်ပွဲ (Women’s Athletic Physique) မှာ အသက် ၂၄ နှစ်အရွယ် မအေးအေးစိုးက မြန်မာနိုင်ငံ အတွက် ပထမဆုံး ရွှေတံဆိပ် ဆု ကို ဆွတ်ခူး ရရှိခဲ့ပါတယ်။ မြန်မာပြည်က ကာယဗလမယ်တွေဟာ နိုင်ငံတကာ ပြိုင်ပွဲတွေမှာ ၂၀၁၂ ခုနှစ် ကမှ စတင်ဝင်ရောက် ယှဉ်ပြိုင်ခွင့် ရခဲ့တယ်လို့ သိရပါတယ်။
ဒါကြောင့် အာဆီယံတန်းဝင် မြန်မာ့ ပထမဆုံး ကာလဗလမယ် ရွှေတံဆိပ်ဆုရှင်ကို ဧရာဝတီ သတင်း ဌာန အကြီးတန်း သတင်းထောက် မေစစ်ပိုင်က အမျိုးသမီး အားကစားသမားများရဲ့ အခန်းကဏ္ဍ၊ တန်း တူညီမျှမှု အခွင့်အရေး၊ ကာယဗလမယ် တယောက်ရဲ့ အတွေ့အကြုံကိစ္စ စတာတွေနဲ့ ပတ်သက်ပြီး တွေ့ ဆုံမေးမြန်းထားပါတယ်။
မေး။ ။ မအေးအေးစိုး အနေနဲ့ စင်ကာပူနိုင်ငံ NUS center မှာလုပ်တဲ့ အမျိုးသမီး ကာယဗလ ပြိုင်ပွဲမှာ တခြားနိုင်ငံတွေကို ကျော်ဖြတ်ပြီး ရွှေဆုရခဲ့တဲ့ အတွေ့အကြုံနဲ့ ပတ်သက်ပြီး သိပါရစေ။
ဖြေ။ ။ ဒီတခေါက် ပြိုင်ပွဲက ပြည်ပအနေနဲ့ လေးကြိမ်မြောက်ပွဲ ပါ။ ပထမ ဆိုတဲ့ ရွှေဆုကို ကျမ မျှော်လင့် မထားဘူး၊ ပြိုင်ဘက်ဖြစ်တဲ့ အိမ်ရှင် စင်ကာပူနိုင်ငံက မယ်ကလည်း အရမ်း ကောင်းတယ်။ ကိုယ့်ထက် စီနီယာကျတဲ့ ကစား သမားတွေရှိတယ်။ ဒီမှာ လေ့ကျင့်သွားတယ်ဆိုပေမယ့် ကျမ မလေ့ကျင့်သွားတဲ့ အကွက်မျိုးကို စင်ပေါ်မှာ ပြသွားတာတွေ ရှိတယ်ဆိုတော့ သူတို့ကိုကြည့်ပြီး ငါလည်း ဒီလိုမျိုးလုပ်လိုက်ရင် ဆိုတဲ့စိတ်ကို ပြန်အားမွေးပြီး စင်ပေါ်မှာ လုပ်ဖြစ်ခဲ့ တာတွေ ရှိတယ်။ ကိုယ့်နိုင်ငံအတွက် ဂုဏ်ဆောင်ခွင့် ရလို့လည်း ပီတိဖြစ်ရတယ်။ ပြိုင်ရတာက Athletic ဆိုတော့ ပြိုင်ပွဲဝင်တွေက ကြွက်သားလှပရမယ်၊ အဆီ မရှိရဘူး၊ ယောက်ျားဆန်လို့မရဘူး။
မေး။ ။ ပြိုင်ပွဲတွေ ဝင်ဖြစ်တာ ကြာပြီလား။
ဖြေ။ ။ ရန်ကုန်မှာတော့ ပွဲအများစု ပြိုင်ပြီးပြီ၊ ပြည်ပမှာ ပြိုင်ရတဲ့ ပွဲတွေဆိုရင်တော့ ရွှေတံဆိပ်ဆု ရခဲ့ တယ်ဆိုတာ ဒါကျမအတွက်လည်း ပထမဆုံး အကြိမ်ပါ။ ကွမ်ကျိုးမှာ ပြိုင်တုန်းက တတိယ၊ ဘန်ကောက် မှာ နံပါတ် ၆ နဲ့ ဗီယက်နမ်မှာ တုန်းက နံပတ် ၅ နေရာရခဲ့ဖူးတယ်။
မေး။ ။ ကာယဗလ ပြရတဲ့ အားကစားနည်းကို ဘယ်တုန်းက စပြီး ဝါသနာပါခဲ့တာလဲ။
ဖြေ။ ။ ကျမ ဆယ်တန်းဖြေပြီးတော့ မြန်မာနိုင်ငံကာယဗလ အဖွဲ့ချုပ်မှာ စာရေးမ ဝန်ထမ်း လုပ်ခဲ့တယ်။ အဲဒီ အချိန်ကစလို့ ကာယဗလမောင် ဆရာ မောင်မောင်ကြည် တို့က တွန်းအားပေးတယ်၊ ကစားခိုင်း တာကြောင့် တဖြည်းဖြည်းနဲ့ ဝါသနာ ပါလာခဲ့တယ်။
မေး။ ။ ကာယဗလ ပြသရတဲ့ အားကစားနည်းကို မြန်မာနိုင်ငံက အမျိုးသမီးတွေ ဘယ်လောက်အထိ စိတ်ဝင်စား တယ်လို့ မြင်လဲ။
ဖြေ။ ။ ဒီလို အားကစားနည်းကို မိန်းကလေးတွေ အရမ်းကြီး စိတ်ဝင်စားတာတော့ မရှိသေးဘူး၊ ဆယ် ဂဏန်းလောက်ပဲ ရှိအုံးမယ်ဆိုတော့ တော်တော်လေး နည်းနေသေးတယ်။ တခြားနိုင်ငံမှာဆိုရင် စိတ် ဝင်စားတာ မိန်းကလေး ရာချီနေပြီ။ ဒါပေမယ့်လည်း အခုချိန်မှာ ယှဉ်ပြိုင်ခွင့် ရလာပြီဆိုတော့ အဲဒီတခုက ကျမတို့အတွက် ကျေနပ်စရာပါပဲ။
မေး။ ။ မြန်မာ မိန်းကလေးအများစုက ကာယဗလမယ် ဆိုတဲ့ အားကစားနည်းကို ဘာကြောင့် စိတ်မဝင် စားကြ တာလို့ သုံးသပ်မလဲ။
ဖြေ။ ။ ဒီမှာက လေ့ကျင့်ခန်း လုပ်တယ်ဆိုတာ ကလည်း နည်းသေးတယ်။ မိန်းကလေးအများစုက လေ့ကျင်ခန်း အရမ်းလုပ်လိုက်ရင် ဗလတွေ အကြီးကြီး ဖြစ်လာမလား၊ မိန်းမဆန်ပါတော့မလား ဆိုပြီး ကြောက်ကြတယ်။ တကယ်တော့ အဲဒီလိုမဟုတ်ပါဘူး။ ဘယ်လောက်ပဲ ပြင်းပြင်းထန်ထန် ကစားပါစေ မိန်းကလေးက မိန်းကလေးပုံစံမျိုးပဲ ဖြစ်မှာပါ။ ဟော်မုန်းအတွက် တားမြစ်ဆေးတွေ သုံးမှသာ ယောက်ျား နဲ့တူနေမှာ။ လေ့ကျင့်ခန်း ပုံမှန်လုပ်ပြီး အစားအသောက် ကိုလည်း သေချာ ဆင်ခြင်မယ်ဆိုရင် အဲဒီလို ဖြစ်လာမှာမဟုတ်ပါဘူး။ မကြောက်ကြပါနဲ့လို့ ပြောပြချင်တယ်။
မေး။ ။ ကာယဗလ ကစားဖို့အတွက် ဘယ်လောက်အထိ ကြိုးစားရလဲ။
ဖြေ။ ။ ဒီအားကစားနည်းက ကစားနေရုံနဲ့လည်း မရဘူး၊ လေ့ကျင့်ခန်းလုပ်ချိန်မှာ ကုန်သွားတဲ့ အားတွေ ကို ပြန်ဖြည့်ဖို့ လုပ်ရတာတွေရှိတယ်၊ တခုမှ လစ်ဟင်းလို့မရဘူး။ အိပ်ချိန်ထချိန်ကအစ အရမ်းကို ကြိုးကြိုး စားစား လုပ်ရတယ်။ အဓိက က Diet လုပ်ဖို့ပဲ၊ ဘာမှအရသာမရှိတဲ့ အစားအသောက်တွေကို မြိန်ရေ ယှက်ရေ ထိုင်စားနေရတယ်။ Diet က အရမ်း အရေးကြီးတယ်၊ ဘယ်လောက်ပဲ ချွေးထွက်အောင် အား ကစားလုပ်လုပ် အစားအသောက်မှာ ထိန်းချုပ်မှု ရှိဖို့က ကာယဗလ အားကစားနည်းမှာ အရမ်းအရေးကြီး တယ်။
မေး။ ။ ကာယဗလမယ် ဆိုတာရဲ့ အားသာချက်က ဘာဖြစ်မလဲ။
ဖြေ။ ။ နိုင်ငံတကာမှာဆိုရင် အားကစားလုပ်ထားတဲ့၊ ကြံ့ခိုင်တဲ့ မိန်းမတယောက်ရဲ့ ပုံစံက ပိုလှတယ်၊ အဲဒီလို မိန်းကလေးတွေက အသက်ကြီးလာတဲ့ အထိ ခန္ဓာကိုယ်အလှအပ မပျက်စီးဘူး။ ခန္ဓာကိုယ်ပေါ် မှာ အဆီ မရှိတော့ မိန်းမငယ်လေး အတိုင်းပဲဖြစ်နေမှာပါ။
မေး။ ။ ကာယဗလမယ် အားကစားနည်းက ဒီမှာ သိပ်ခေတ်မစားသေးတော့ ဘယ်လောက်အထိ ကြိုးစား ရမလဲ။
ဖြေ။ ။ မြန်မာနိုင်ငံမှာ တခြားနိုင်ငံတွေမှာက အမျိုးသမီး ကာယဗလမယ်တွေ ပြိုင်နေကြတာ နှစ်ပေါင်းများ စွာရှိနေပြီ။ ကျမတို့ နိုင်ငံမှာက ၂၀၁၂ ခုနှစ်မှ စပြီး ယှဉ်ပြိုင်ခွင့်ပေးတာဆိုတော့ တခြားနိုင်ငံတွေနဲ့ ယှဉ် လိုက်ရင် အရမ်း နောက်ကျ နေတယ်။ သူတို့တတွေ ၂ ဆ ကြိုးစားချိန် ကျမတို့ ၅ ဆ ကြိုးစားမှရမယ်။ အရင်က ပြည်ပမှာ သွားပြိုင်ခွင့် မရခဲ့ကြပေမယ့် အခုနောက်ပိုင်းမှာ ကစားရင် ကစားသလို သွားပြိုင်ခွင့် ရလာပြီဆိုတော့ နိုင်ငံဂုဏ်ဆောင်ဖို့ အခွင့်အရေးတွေ ရလာပါပြီ။
မေး။ ။ မိသားစုရဲ့ အားပေးမှု အတိုင်းအတာက ဘယ်လောက်အထိ ရှိလဲ။
ဖြေ။ ။ အရင်ကဆိုရင်တော့ အားမပေးဘူး၊ မြန်မာ့အမြင်အရ ရှေးလူကြီးတွေဆိုတော့ ဒီလိုကစားနည်းကို သူတို့မကြိုက်ကြဘူး၊ ကန့်ကွက်ခဲ့တယ်ပေါ့။ အခု နောက်ပိုင်းမှာတော့ ကျမအတွက် အားပေးမှုတွေ အများ ကြီးရှိလာပြီ။
မေး။ ။ အပြင်ဘက်က ဝေဖန်သံတွေကိုရော ဘယ်လို ကြားသလဲ။
ဖြေ။ ။ ကာယဗလမောင် လောကကတော့ အားကစားနည်း စိတ်ဝင်စားတဲ့ ယောက်ျားလေးတွေက ဒီကစားနည်းကို နားလည်ပေမယ့် မိန်းကလေး ကာယဗလမယ် ဆိုတာကျတော့ … ဟာ ကြောက်စရာ ကြီး၊ ဗလကြီးနဲ့ ယောက်ျားကြီးလား ဆိုတာမျိုးရှိတယ်။ ဒါကြောင့် မကြောက်ဘဲနဲ့ အားပေးကြပါလို့ ပြော ချင်တယ်။
မေး။ ။ ဆီးဂိမ်းတုန်းက ပြိုင်ခဲ့တဲ့ အားကစားသမားတချို့က တားမြစ်ဆေးတွေ သုံးလို့ ဆုတံဆိပ်တွေ ပြန်သိမ်းခံရတယ်လို့ သိရတော့ ကစားသမားတွေ တားမြစ်ဆေးသုံးတာ ဘယ်လိုမြင်လဲ။
ဖြေ။ ။ နိုင်ငံတကာမှာလည်း အဲဒီလိုသုံးကြပါတယ်။ ပြိုင်ပွဲဝင် အဆင့်မှာတင်မဟုတ်ဘဲ တခြားနိုင်ငံတွေ မှာ ဝါသနာအရ သုံးကြတာပါပဲ။ ဒီတခေါက်ဆီးဂိမ်းမှာ ကာယဗလမောင် ကိုမင်းဇော်ဦးက တားမြစ်ဆေး မိတယ်လို့တော့ ကြားပါတယ်။ အဲဒီဆေးဆိုတာကလည်း ကာလအတိုင်းအတာတခုအထိ ခန္ဓာကိုယ်မှာ ကျန်နေတတ်တာ။ ဒီနေ့ဒီအချိန်မှာ ဆေးစစ်ရင် မပေါ်အောင်လို့ ဘယ်လိုလုပ်ရမလဲဆိုတဲ့ နည်းပညာမျိုး ရှိ တယ်။ ဒီမှာလည်း လိုပါတယ်။ ကစားသမားတွေက ခန္ဓာကိုယ်ထဲမှာ သာမန်ဟော်မုန်းပဲရှိရင် တခြားနိုင် ငံတွေ နဲ့ ယှဉ်ပြိုင်ဖို့ မလွယ်ဘူး။ ကိုယ်တွေ နိုင်ငံကလည်း ရှိတဲ့ အင်အားနဲ့ ပြိုင်တာထက် တခြားနိုင်ငံတွေ ကို အနိုင်ရအောင် ယှဉ်ပြိုင်ဖို့ဆိုရင် သမားရိုးကျနည်းနဲ့ မသွားဘဲ နည်းပညာတွေ အများကြီး လိုသေး တယ်။
မေး။ ။ မြန်မာအမျိုးသမီးတွေမှာ အမျိုးသားတွေနဲ့ တန်းတူအခွင့်အရေးတွေ ရလာပြီလို့ မြင်လား။
ဖြေ။ ။ မိန်းကလေးတွေ အများစုက ယောက်ျားလေးနဲ့ ယှဉ်လိုက်ရင် စိတ်ပျော့ကြတာတော့ များတယ်၊ ဒါပေမယ့်လည်း ဘယ်နေရာကို ကြည့်ကြည့် တကယ်ထက်မြက်တဲ့ မိန်းကလေးတွေ မြန်မာပြည်မှာ အများကြီး ရှိလာတာ တွေ့ရပါတယ်။ အမျိုးသမီးတွေကို နေရာပေးလာတာတော့ အရင်ကထက် ရှိလာတယ်။
The post အာဆီယံတန်းဝင် မြန်မာ့ပထမဆုံး ကာယဗလမယ် ရွှေတံဆိပ်ဆုရှင်နှင့် တွေ့ဆုံခြင်း appeared first on ဧရာဝတီ.
-------------------------------------------------
ကိုမျိုး (lwanmapyay.blogspot.com)