စိတ်ဒဏ်ရာတွေ မကျန်ရစ်စေနဲ့

ဇွန် ၁ ရက်နေ့ဟာ နိုင်ငံတကာကလေးများနေ့ ဖြစ်တယ်။ လွန်ခဲ့တဲ့ ၈၉ နှစ် (၁၉၂၅ ခုနှစ်) က ကလေးတွေနဲ့ပတ်သက်ပြီး အကောင်းဆုံးဖြစ်အောင် ဘာလုပ်ပေးနိုင်မလဲလို့ နိုင်ငံတကာခေါင်းဆောင် တွေဆွေးနွေးတဲ့ ညီလာခံတစ်ရပ် ဆွစ်ဇာလန်နိုင်ငံ ဂျီနီဗာမြို့မှာ ကျင်းပပြီးနောက် အဲဒီနေ့ကို နိုင်ငံတ ကာကလေးများနေ့လို့ သတ်မှတ်ခဲ့ကြတယ်။

ကျွန်တော်တို့လို ဖွံ့ဖြိုးမှုနောက်ကျကျန်ခဲ့တဲ့နိုင်ငံတွေအဖို့တော့ အဲဒီနေ့မှမဟုတ် နေ့ရက်တိုင်းဟာ ကလေးများအနာဂတ်ကို အစဉ်နှလုံးသွင်းဖို့လိုအပ်နေတယ်။ အထူးသဖြင့်မသိလို့ဖြစ်စေ၊ သတိနဲ့ မဆင်ခြင်မိလို့ဖြစ်စေ မိမိရင်သွေးတွေအပေါ် ထိန်းချုပ်ဆုံးမမှု၊ အလေးမမူဂရုမစိုက်မှုတွေကနေ သူတို့ အတွက်တစ်သက်တာစိတ်ဒဏ်ရာတွေ ဖြစ်စေတာကို သတိပြုမိစေဖို့ ဒီဆောင်းပါးလေး ရေးဖြစ်တယ်။

ကလေးတိုင်းဟာ . . ချစ်ခြင်းမေတ္တာလိုအပ်တယ်

အထူးသဖြင့် . . .

ချစ်မွှေးမပါ၊

မေတ္တာထားစရာ မကောင်းတဲ့

ကလေးတွေက

ချစ်ခြင်းမေတ္တာ ပိုမိုလိုအပ်တယ်။

(အမည်မသိ နော်ဝေစာဆို)

ရင်ဘတ်အနာ

ကျွန်တော်တို့နိုင်ငံလို စီးပွားရေး၊ နိုင်ငံရေး၊ သဘာဝဘေး၊ စစ်မက်ရေးရာတွေကြောင့် မိသားစုတွေ ဖရို ဖရဲတကွဲတပြားဖြစ်မှု၊ အခြေတကျမဖြစ်မှု၊ မိဘမဲ့ပြဿနာ၊ အိမ်ခြေရာခြေမဲ့ ပြဿနာတွေကနေ ခိုကိုးရာမဲ့ ရင်သွေးငယ်တွေမှာ စိတ်ဒဏ်ရာတွေစွဲငြိနေမှာတော့ အသေအချာပါပဲ။ ဒီကိစ္စ စိုးရိမ်တကြီး နဲ့အလေး အနက်တွေးရမယ့် တိုင်းပြည်ရဲ့ကြီးမားတဲ့အနာဂတ်ပြဿနာပါ။ ဒီကလေးတွေရဲ့ စိတ်အလို မပြည့်ဝမှု၊ အကြောက်တရားစွဲကပ်မှု၊ ချစ်ခြင်းမေတ္တာနဲ့ဝေးကွာမှု၊ ပညာမဲ့မှု၊ ဒေါသစွဲကပ်မှုတွေက သူတို့ရဲကနုနယ် တဲ့နှလုံးသားနဲ့ ဦးနှောက်ထဲမှာ သံမှိုစွဲသလို မြဲမြံနေကြပြီ။ ဒါဆို သူတို့မောင်းနှင်မယ့် အနာဂတ်ဟာ သန့်ရှင်းနိုင်ပါ့မလား။ ကျွန်တော်တို့ ဒီကလေးတွေကို မငြိမ်းချမ်းမှုတွေ၊ စိတ်ညစ်နွမ်းမှု တွေ၊ လိုဘ မပြည့်မှုတွေ၊ မတော်မတရားမှုတွေ၊ ဒေါသနဲ့ကြီးနိုင်ငယ်ညှဉ်းစိတ်ဓာတ်တွေကို ဆင်ခြင် ဉာဏ်ကင်းက င်းနဲ့ မိုက်မဲစွာပေးခဲ့မိပြီ။ ဒီအတွက် ရလဒ်ကဘယ်လိုနည်းနဲ့မှမကောင်းနိုင်တော့ပါ။

ပခုံးသပ်တာခံရတယ်၊

တင်ပါးကို အကန်ခံရတယ်

ပခုံးနဲ့ တင်ပါး

ဒီနှစ်ခုကြား၊

ကျောရိုး အဆစ်လေးနည်းနည်းသာ

ခြားနားထားတာပါ။

ဒါပေမဲ့

ခံစားချက်တွေကတော့

ကမ္ဘာနဲ့ချီ ကွာခြားလွန်းပါတယ်။

(အမည်မသိ နော်ဝေစာဆို)

တော်လှန်ရေးနှစ်ရပ်

ကျွန်တော်တို့ကိုယ်တိုင် မြန်မာပြည်ရဲ့စနစ်ဆိုးအောက်မှာ မွေးဖွားကြီးပြင်းလာခဲ့သလို ကလေးဘဝ ကတည်းကလွဲမှားတဲ့ ပညာရေးပုံစံ၊ ဆင်းရဲမှု၊ စိတ်အလိုမပြည့်မှု၊ အနိုင်ကျင့်ဗိုလ်ကျခံရမှုတွေကို နယ် ပယ်အသီးသီးမှာကြုံခဲ့ရသူတွေ ဖြစ်တယ်။ ကြီးပြင်းအရွယ်ရောက်လာတဲ့အခါ မိမိဘဝရဲ့ စိတ်အမာ ရွတ်တွေက ပျောက်မသွားပါ။ ၁၉၈၈ တောခိုခဲ့စဉ်က လုပ်ဖော်ကိုင်ဖက်တွေနဲ့ ကိုယ့်အကြောင်း သူ့အ ကြောင်းစကားတွေစပ်မိတော့ အများစုဟာငယ်စဉ်ကတည်းက မိသားစုနဲ့ ပတ်ဝန်းကျင်အကြား စိတ် သောကတွေ၊ စိတ်ဆန္ဒအလိုမပြည့်မှုတွေရှိခဲ့သလို၊ ခေတ်စနစ်ရဲ့ ဖိနှိပ်ခံရမှု၊ ခွဲခြားဆက်ဆံခံရမှု၊ အနာ ဂတ်မရေရာမှုနဲ့ မလွတ်လပ်တဲ့ ဘဝပေးအနေအထားတွေ ကြုံကြိုက်ရသူတွေဖြစ်ပါတယ်။ စိတ်ဒဏ်ရာ တွေကိုယ်စီရှိနေတယ်။ မိမိဘဝနဲ့မိမိပတ်ဝန်းကျင်၊ မိမိနိုင်ငံကို အကောင်းဆုံးထုဆစ်လိုတဲ့စိတ်တွေ ပေါ်ပေါက်ခဲ့ကြတယ်။ ဒီလိုနဲ့တော်လှန်ရေးတစ်ရပ်ဆင်နွှဲခဲ့တယ်။

နိုင်ငံရေးပဋိပက္ခဟာ ဒီနေ့အထိ အဆုံးမသတ်သေးပါဘူး။ တစ်ချိန်က ရုပ်ပိုင်းဘဝနွမ်းပါးမှုကို အခြေခံ ပြီးဖြစ်လာတဲ့ နိုင်ငံရေးပဋိပက္ခဟာ ဒီကနေ့ကာလမှာတော့ စိတ်ပိုင်းဘဝ ချွတ်ခြုံကျမှုကိုပါရင်ဆိုင်နေရ ပါပြီ။ ရုပ်ပိုင်းဘဝပြည့်စုံဖို့သာမဟုတ်၊ စိတ်ပိုင်းဘဝပြည့်ဝအောင်ပါ လုပ်ဆောင်ရမယ့် တော်လှန်ရေး တာဝန်နှစ်ရပ်ကို ထင်ထင်ရှားရှားတွေ့နေရပါတယ်။

မိမိကိုယ်ကို ဦးစွာတော်လှန်

ကျွန်တော်တို့မမွေးခင်နဲ့ ငယ်ရွယ်စဉ်တုန်းက ခေတ်စနစ်ကပေးခဲ့တဲ့ဒဏ်ရာတွေနဲ့ ပေကျံခဲ့တယ်။ ဒီအကျိုးဆက်ဟာ ကျွန်တော်တို့ရှင်သန်နေတဲ့ ဒီကနေ့ထိမပျောက်မပျက်နိုင်တဲ့ အမာရွတ်တွေအတိုင်း ရှိနေတုန်းပါ။ ကျွန်တော်တို့ဘဝမှာ၊ ဒဏ်ရာတွေရှိနေတဲ့ကြားကပဲ နောင်မျိုးဆက်တွေ ဒဏ်ရာကင်း အောင်၊ စိတ်လုံခြုံအောင် သတိတရားနဲ့ အသေအချာဆောင်ရွက်နိုင်ဖို့လိုပါတယ်။ ဒီအတွက်မိမိကိုယ် မိမိအရင်ဦးဆုံး တော်လှန်ရမှာဖြစ်တယ်။ မိမိကရော ဘယ်လောက်ရင့်ကျက်ပြီး၊ ဘယ်လောက်စာနာ နိုင်ပြီလဲ။ ဘယ်လောက်သည်းခံနိုင်ပြီး ဘယ်လောက်ပေးဆပ်နိုင်ပြီလဲ။ ကိုယ့်ဘာသာကိုယ် ပြန်ပြီး မေးခွန်းထုတ်စရာတွေ အများကြီးရှိနေပါတယ်။ ကိုယ့်ဘာသာကိုယ် မြင်သိပြီး ကိုယ့်ကိုယ်ကိုယ်ဝေဖန် တည့်မတ်ဖို့ဆိုတာ လွယ်ကူတဲ့အရာတော့မဟုတ်ပါ။ အစွဲတွေချွတ်ပြီး အသစ်ကိုလက်ခံနိုင်တဲ့ နှလုံး သားလည်းရှိရသလို မှားရင်မှားတယ်လို့ဝန်ခံရဲ၊ ပြင်ရဲတဲ့စိတ်ဓာတ်မျိုးလည်း မွေးမြူရဲရပါတယ်။

မိဘတွေထားရမယ့်စိတ်ဓာတ်

ကျွန်တော် နော်ဝေနိုင်ငံ အော်စလိုရောက်ပြီး နောက်တစ်နှစ်လောက်မှာ မိဘတွေ မိမိတို့သားသမီး တွေကို ဘယ်လိုထိန်းသိမ်းဆုံးမကြမလဲဆိုတဲ့ ပညာသင်တန်းတစ်ခုတက်ရပါတယ်။ ကျယ်ပြန့်တဲ့ အတွေးအမြင်တွေ ပေးပါတယ်။ မှတ်စုတိုတွေပြန်ကြည့်တော့ . . .

- ကလေးတွေထိတ်လန့်၊ စိုးရိမ်၊ ပူပန်အတွေးမဝင်မိစေနဲ့။ (အနာဂတ်မှာ အနာတရဖြစ်မယ်)

- သဘာဝကိုစူးစမ်းပါစေ။ လွတ်လပ်ပျော်ရွှင်နေပါစေ၊ သိလိုတာစိတ်ရှည်စွာရှင်းပြ (ဗဟုသုတသာမက စိတ်ငြိမ်အေးပြီး သည်းခံစိတ်တွေပေါ်လာမယ်)

- အသိအမှတ်ပြုပေး၊ အကောင်းမြင်၊ အပြုစိတ်နဲ့ အမြဲချီးကျူးပါ။ ဗွေဆိုးသူကို ပိုပြီးအကောင်းရှာကြံချီး ကျူးပါ။ (ပြဿနာကို ငြိမ်းချမ်းစွာအဖြေရှာတတ်လိမ့်မယ်)

- တန်းတူရည်တူ၊ အရေးတယူထားပြောဆိုဆွေးနွေးပေးပါ။ စိတ်ဓာတ်မြှင့်တင်ပေးပါ။ (ကိုယ်ချင်းစာပြီး လူတိုင်းကို အသိအမှတ်ပြု၊ လေးစားစိတ်ဖြစ်ပေါ်မယ်)

- ဆတ်ဆတ်ထိမခံနိုင်တာ၊ ပြန်လှန်တုံ့ပြန်ခိုင်းတာ၊ အားနည်းချက်ထိပါးတာ၊ စိုးရိမ်ကြောင့်လန့်အောင် ခြိမ်းခြောက်တာ၊ ဆုပေးဒဏ်ပေးလုပ်တာ၊ အလွန်အကျွံမြှောက်ပင့်တာ လုံးဝမလုပ်မိစေနဲ့။

- မဟုတ်တာလုပ်မိရင် ငြူစူပိတ်ပင်တာထက်၊ အကြောင်းအကျိုးရှင်းပြီး ဒါလုပ်တာပိုကေင်းတယ်လို့ အဆိုးကိုလွှဲ၊ အကောင်းဘက်ညွှန်ပါ။

- ရိုးသားမှုရှိဖို့ မြင့်မားတဲ့စည်းကမ်းမျိုးမသတ်မှတ်နဲ့ လိမ်ညာပြောဆိုကုန်လိမ့်မယ်။ (သူလုပ်နိုင်သ လောက်သာ ရှေ့တိုးလုပ်ဆောင်ခိုင်းပါ။ ယုံကြည်မှုအစွမ်းအစထက်လာလိမ့်မယ်)

- လူရှေ့သူရှေ့ အမြဲမဆူနဲ့ အမှန်အမှားနဲ့ ကိုယ်ကျင့်တရားကို မချင့်ချိန်တတ်ပဲနေလိမ့်မယ်။

- ကြင်နာစိတ် (Symparti) နဲ့ကိုယ်ချင်းစာစိတ် (Empati) ရှိအောင် ပုံပြင်၊ ဥပမာနဲ့လမ်းပြပါ။

ဒီလိုမှတ်စုအတိုအထွာ အတော်များများဖတ်ကြည့်ပြီး ကိုယ့်ဘာသာ သတိချွန်းနဲ့အုပ်မိတယ်။

ကလေးတွေကို ကာကွယ်တဲ့ဥပဒေ

နော်ဝေအပါအဝင် ဥရောပနဲ့ အနောက်နိုင်ငံတွေမှာ ကလေးသူငယ် ကာကွယ်စောင့်ရှောက်ရေးဥပဒေ ကိုပြဋ္ဌာန်းထားတယ်။ ကလေးကို အကြမ်းမဖက်ရ (ဒဏ်ရာအနာတရဖြစ်စေတဲ့ ရိုက်နှက်ဆုံးမမှု) စိတ်ပိုင်းဆိုင်ရာ ကျန်းမာရေးကို ထိခိုက်ယိုယွင်းစေတဲ့ အပြုအမူနဲ့လုပ်ဆောင်မှုများ ပိတ်ပင်သည်လို့ ဖော်ပြပါတယ်။ တကယ်လို့များ မိဘ သို့မဟုတ် အုပ်ထိန်းသူက ဥပဒေကျူးလွန်တာတွေ့ရင် ကလေး သူငယ်ကာကွယ်စောင့်ရှောက်ရေးဌာနက အိမ်တိုင်ရာရောက်လာပြီး ကလေးကိုခေါ်ဆောင်ထိန်းသိမ်း ပါတယ်။ ကလေးတွေခန္ဓာကိုယ်မှာ ရိုက်နှက်နှိပ်စက်ခံရတဲ့ ဒဏ်ရာတွေကို ကျောင်းဆရာ၊ ဆရာမတွေ ကမြင်ရင်ဖြစ်စေ၊ ထိခိုက်ကြေကွဲမှုနဲ့ ကြောက်ရွံ့စိုးရိမ်မှုတွေတွေ့ရရင်လည်း မိဘတွေဆီ စာရေးသတိ ပေးပါတယ်။ ထပ်မံကျူးလွန်ရင် ကလေးထိန်းဌာနကို အကြောင်းကြားပါတယ်။ မိဘတွေက ကလေး ကိုတာဝန်မယူနိုင်၊ မထိန်းသိမ်းနိုင်ဘူးဆိုရင်လည်း အစိုးရကထိန်းသိမ်းစောင့်ရှောက် ပညာသင်ပေးပါ တယ်။ ကလေးတွေနဲ့ ဆယ်ကျော်သက်လူငယ်တွေကို ထိန်းသိမ်းစောင့်ရှောက်ပညာသင်ပေးတဲ့ ဌာန ရှိပါတယ်။ မိဘတွေဆိုဆုံးမလို့မရရင်လည်း သူတို့ဆီအပ်နှံလို့ရပါတယ်။ အဲဒီရောက်သွားတဲ့ကလေး တွေဟာလိမ္မာယဉ်ကျေးပြီး ပညာတတ်လာတာလည်း တွေ့ရပါတယ်။

ကလေးကျန်းမာရေးနဲ့ ပတ်သက်ရင်လည်း မိခင်ကိုယ်ဝန်ရှိစဉ်ကစပြီး ငွေထောက်ပံ့တာ၊ အခမဲ့ စမ်း သပ်တာ၊ သားဖွားတာကစပြီး မူကြိုအဆင့်၊ မူလတန်း၊ အလယ်တန်းစတဲ့ အသက် ၁၈ နှစ်မပြည့်မချင်း ကလေးကျန်းမာရေးကို အစိုးရက အခမဲ့တာဝန်ယူတယ်။ ရုပ်ပိုင်းစိတ်ပိုင်းကျန်းမာရေးဆိုတဲ့နေရာမှာ သွားပိုးစားတာ၊ သွားနုတ်တာ၊ သွားအလှပြုပြင်တာကအစ တာဝန်ယူပါတယ်။ တိုင်းပြည်ဓနအင်အား တောင့်တင်းမှုထက် အစိုးရရဲ့ ပြည်သူအပေါ်တာဝန်ယူ စောင့်ရှောက်မှုစနစ် အားကောင်းတာက အဓိကကျပါတယ်။ 

Democracy Today Daily
မေလ (၃၁) ရက်၊ ၂၀၁၄ ခုနှစ်

-------------------------------------------------
ကိုမျိုး (lwanmapyay.blogspot.com)

ဆက်စပ်ဖတ်ရှုရန် အကြောင်းအရာများ...