Aphthous ulcer အပူနာ အအေးနာ

ဆရာ မင်္ဂလာပါရှင့်။ ကျွန်မ ပါးစပ်မှာ (အများအားဖြင့် နှုတ်ခမ်း အတွင်းဘက်နဲ့ လျှာပေါ်မှာ) အဖြူရောင် အနာလေးတွေ မကြာ ခဏ ဖြစ်ပါတယ်။ အဲလိုဖြစ်တဲ့ ရက်တွေဆိုရင် အစားစာရတာ၊ ရေသောက် ရတာကအစ အရမ်းနာလို့ အဆင်မပြေပါဘူး။ ဆေးခန်း ပြတော့လည်း အပူတွေများတယ် လို့ပြောတယ်။ တချို့ပြောတော့လည်း Vitamin C ချို့တဲ့ တာလို့ပြောတယ်။ (၁) အဲဒါ ဘာကြောင့်ဖြစ်တာပါလဲ။ (၂) အဲလိုမဖြစ်အောင် နေထိုင် စားသောက်နည်းလေး သိချင်ပါတယ်။ (၃) ဖြစ်ရင်ရော ဘာဆေး ၀ါး သုံးစွဲသင့် ပါသလဲ?

ပါးစပ်နာတွေထဲမှာ လူတွေအများဆုံး ဖြစ်ကြတာကို Aphthous ulcer လို့ ဆေးစာနဲ့ခေါ်တယ်။ အင်္ဂလိပ်လို Cold sores လို့ခေါ်တယ်။ သူများတွေနဲ့ ကျွန်တော်တို့နဲ့ ဒီနေရာမှာပြောင်းပြန်။ အရပ်ခေါ် အပူကန်နာလို့ ပြောကြတယ်။ ပါးစပ်ထဲ ဘယ်နေရာမဆို ဖြစ်တယ်။ အောက်နုတ်ခမ်းမှာ အဖြစ်များတယ်။ လျှာအောက်လဲဖြစ်၊ ပါးစောင်လဲ မလွတ်ဘူး။ တခုမကလဲဖြစ်။ ဖြစ်ပြီးပျောက်၊ ပျောက်ပြီး ပြန်ပေါက်တတ်သေးတယ်။

ဘာလို့ ဖြစ်သလဲ။ ဗီတာမင်တွေချို့ယွင်းလို့ မဟုတ်ပါ။ ရောဂါပိုးဝင်လို့ မဟုတ်ပါ။ ကူးစက်ရောဂါ မဟုတ်ပါ။ အစာ စားချိန် မမှန်သူ၊ ခရီးသွားနေရလို့၊ ဝမ်းသွားမမှန်သူ၊ အလုပ်များသူ၊ စိတ်ရှုတ်သူတွေမှာ ဖြစ်တယ်။ အားနည်းနေချိန် မျိုးမှာ လာဖြစ်တတ်တယ်။ အပူများတာ (ကော်ဖီ၊ လက်ဘက်ရည်) သောက်မိသူတွေမှာလဲ ဖြစ်လေ့ရှိတယ်။ အရက်-ဆေးလိပ်လဲ စာရင်းထဲမှာ ပါတယ်။ အစပ်များတာ စားမိသူကိုလဲ ထည့်ရေးကြပေမဲ့ တကယ်အစပ်စား သူတွေမှာ ပိုဖြစ်တာ မတွေ့ဘူးပါ။ ရွှေလံဘို ငရုတ်စားတဲ့ နာဂတွေ၊ ကသည်းတွေမှာ (ဗမာလဲပါတယ်) ထူးဖြစ်တာ မရှိပါ။

အနာပုံစံက တခါတွေ့ဘူး၊ မှတ်ထားဘူးရင် မလွဲနိုင်ဘူး။ ခပ်ဝိုင်းဝိုင်းနေမယ်။ တလက္မရဲ့ ၁ဝ ပုံ ၁ ပုံကနေ ၅ ပုံလောက် အထိ ကြီးတယ်။ အလည်ပိုင်းက ခပ်ဝါဖြူဖြူနဲ့ ခွက်နေပြီး၊ ဘေးနုတ်ခမ်းက နီရဲနေမယ်။ ဖြစ်ရင် အတော် နာတယ်။ ပူစပ်နေမယ်။ ရေသောက်တာတောင်မှ မခံချင်ဘူး။ ထမင်းစားရင် သိပ်ဒုက္ခရောက်တယ်။

• ကုဘို့ဆိုတာ ဖြစ်စေတာကို ပြင်ရမှာ အဓိကဖြစ်တယ်။ စားချိန်၊ အိပ်ချိန် မှန်ပါစေ။ ခရီးသွားရရင် စားတာ၊ ဆီးဝမ်း သွားတာ ဂရုစိုက်ပါ။
• ဆားရည်နဲ့ တနေ့ ၂ ကြိမ်၊ ပါးစပ်ဆေးပါ။
• ဗီတာမင် ဘီအုပ်စု နဲ့ ဗီတာမင်စီ များများပေးတယ်။ 500 mg တနေ့ ၂ ကြိမ်။
• အနာပေါ်ကို Glycerin အလှဆီ လိမ်းပေးနိုင်တယ်။
• ထောပတ်၊ ပျားရည်လဲ လိမ်းကြတယ်။ တချို့က ညောင်ရွက်ကို ကြိတ်ပြီး လိမ်းတယ်။ ကြက်သွန်ဖြူလဲ သုံးကြ တယ်။
• အစာအိမ်နာရောဂါ ရှိနေသူတွေကို အုန်းဆီ နဲနဲ သောက်ခိုင်းတယ်။
• သင်္ဘောသီးမှည့် စားတာကောင်းတယ်။
• ဂျုံစာထက် ဆန်စာက ပိုသင့်တယ်။
• Lido cream, Nupacainel, Xylocaine ထုံဆေးလိမ်းဆေးကို သုတ်လိမ်းလိုက်ရင် ခဏလောက် မနာတော့ဘဲ ထမင်းစားနိုင်လိမ့်မယ်။ ထုံဆေး ပျယ်ရင် ပြန်နာမယ်။
• မပျောက်နိုင်သူတွေကို Corticosteroids ပါတဲ့လိမ်းဆေး ပေးနိုင်တယ်။
• Paracetamol တို့ Ibuprofen တို့လို အနာသက်သာဆေး တခါသောက် ၁ ပြား၊ တနေ့ ၂-၃ ကြိမ်၊ အစာနဲ့သောက်ပါ။
• Gentian violet paint ခရမ်းရောင်ဆေး လိမ်းရင် ပိုးဝင်တာ ကာကွယ်နိုင်တယ်။ (နောက်ပိုင်းမှာ မသုံးတော့ပါ။)
• ရေများများသောက်ပါ။
• စိတ်ဖိအား နည်းပါးပါစေ။

Dr. တင့်ဆွေ

--------------------------------------
ကိုမျိုး(lwanmapyay.blogspot.com) လွမ်းမပြေ သုတရပ်ဝန်း | Facebook

ဆက်စပ်ဖတ်ရှုရန် အကြောင်းအရာများ...