အင်တာနက်ပိုမြန်စေရန် BandWidth ပမာဏ 20GB ထပ်ချဲ့မည်
photo:www.adminempire.comပြည်တွင်း၌ အင်တာနက်အသုံးပြုခြင်းကို ယခုထက်ပို ၍ မြန်ဆန်စွာအသုံးပြုနိုင်စေရန် BandWidth ပမာဏ 20GBခန့်ကို ယခုနှစ်အတွင်း ထပ်မံတိုးချဲ့သွားမည်ဖြစ်ကြောင်း မြန်မာ့ဆက်သွယ်ရေးလုပ်ငန်း Internet Service Providerဌာနမှ သတင်းရရှိသည်။
‘‘ဖိုက်ဘာကေဘယ်လိုင်းကနေ အင်တာနက်ကောင်းကောင်း အသုံးပြုနိုင်ဖို့အတွက် BandWidth ပမာဏ ထပ်ပြီးတိုးချဲ့ဖို့ ကုမ္ပဏီတွေကို တင်ဒါခေါ်သွားဖို့ စီစဉ်နေပါတယ်။ ဒီနှစ်ထဲမှာပဲ ထပ်ပြီးတိုးချဲ့နိုင်ဖို့လုပ်နေပါ တယ်’’ ဟု Internet Service Provider ဌာနမှ အင်ဂျင်နီယာချုပ်ဦးမျိုးဆွေကပြောသည်။
မြန်မာနိုင်ငံအနေဖြင့်လက်ရှိအချိန်အထိ ပြည်ပနိုင်ငံများနှင့် ချိတ်ဆက်ထားသည့် BandWidth ပမာဏမှာ 27GB ခန့်ရှိပြီး ထိုင်းနိုင်ငံမြ၀တီနယ်စပ်ဖိုက်ဘာဆက်ကြောင်းမှ 18GB၊ တရုတ်နိုင်ငံ မူဆယ်နယ်စပ် ဖိုက်ဘာဆက်ကြောင်းမှ 2GB၊ ပင်လယ်ရေ အောက်ဖိုက်ဘာဆက်ကြောင်းမှ 7GB ဖြင့် အသီးသီးချိတ် ဆက် ထားကြောင်း သတင်းရရှိသည်။
‘‘လက်ရှိ မှာ BandWidth ကို 27GB လောက်ချိတ်ထားတယ် ဆိုပေမယ့် ပြန်ပြီးတော့ဖြန့်ဖြူးဖို့ ဖိုက်ဘာ ကွန်ရက်တွေက နည်းနေ သေးတဲ့အတွက် 14GB လောက်ပဲ ပြန်ဖြန့်နိုင်သေးတယ်။ အဲဒါ ကြောင့် ဖိုက်ဘာကွန်ရက်တွေတိုး ချဲ့သွားဖို့လည်း စီစဉ်နေပါတယ်’’ ဟု ဦးမျိုးဆွေကရှင်းပြသည်။
ပြည်တွင်း၌ ဖိုက်ဘာကွန်ရက်များတိုးချဲ့သွားရန် စီစဉ်လျက်ရှိသလို BandWidth ပမာဏထပ်မံ တိုးချဲ့ရန်အတွက် တာချီလိတ်ဘက်မှ ဖိုက်ဘာဆက်ကြောင်းသစ်နှင့် တရုတ်နိုင်ငံမူဆယ်နယ်စပ်မှ ဖိုက်ဘာဆက်ကြောင်းတို့ကို ပမာဏတိုးချဲ့ခြင်းပြုလုပ်သွားရန်စီစဉ်လျက်ရှိကြောင်း သတင်းရရှိသည်။
အဆိုပါလုပ်ငန်းများပြီးစီးပါက ဖိုက်ဘာကွန်ရက်မှတစ်ဆင့် အင်တာနက်ပြန်လည်ဖြန့်ဝေခြင်း ကို ဆက်သွယ်ရေးဥပဒေနှင့်အညီ ပုဂ္ဂလိကလုပ်ငန်းရှင်များအား လုပ်ကိုင်ခွင့်ပြုပေးမည်ဖြစ်ကြောင်း သတင်းရရှိသည်။
7Day Daily
No.379 Thursday, May 15, 2014
-------------------------------------------------
ကိုမျိုး (lwanmapyay.blogspot.com)